في أجازة الصيف اللي فاتت كنت مرتب أذاكر فيها وأعمل أبحاث في تخصصي لكن اجلت كتير وكسلت فحبيت اعاقب نفسي وقلت اشتغل ده بالأضافه للحاله الماديه وقتها مكنتش ولابد
سألت أحد أصحابي كان شغال أنتا شغال أيه ؟ وهل محتاجين ناس عندكم ؟ سأل وطلعوا محتاجين ناس
أشتغلت معاه لكن أشتغلت يوم واحد لأن الشغلانه كانت عتاله ( بكسر العين ) وكانت صعبه جدا لكن حتى لو مكنتش صعبه كنت هسيبها لسبب هقوله
بدأنا شغل من اول ما رحنا
شيل حط حمل روح تعالى
وجه وقت الصلاه وظهر الغضب على وجه الريس بتاعنا عشان رحنا نصلي في مجموعه
بذريعة احتمال مجيء شغل واحنا بنصلي المفروض نصلي واحد واحد أو نصلي في مكان الغداء وده مكان ضيق جدا وميستوعبش
مع ان في ناس مصلتش معانا وكانت قاعده لحد ما جينا
موضوع الصلاه ميقدرش الريس بتاعنا يعمل حاجه فيه الا الغضب بس وده اقصى ما عنده ما دام لقى ناس معاه فاهمه يعني ايه صلاه (صلينا بعد كده زي ما احنا عيزين)ا
وفي منتصف اليوم دخلنا احد المخازن (نسيت أقول ان الشركه بتعمل في الاستيراد والتصدير) وكان فيها بضاعه بالاطنان كانت عباره عن اكياس من المواد الغذائيه حمولة الكيس تقريبا 50 كيلو
الاكياس دي كانت من غير تكت يعني لا عليها تاريخ ولا اي حاجه
كان شغلنا في الوقت ده بنخيط التكت علي الاكياس بماكينه مخصصه للعمل ده (كانت عمليه شاقه شيل وحط بدون راحه)ا
كنت فاكر ان الشركه هي اللي قامت بالتعبئه هنا في مصر وبذلك لها الحق في وضع التواريخ لكن البضاعه كلها مستورده
لكن ازاي مستوره كده من غير اي بيانات مش عارف
هل الشركه قامت بتعبئتها مره تانيه لتغيير تاريخ الصلاحيه
ولا هي عدت كده من المينا
كل الاحتمالات وارده
اثناء ذلك وعلى فجأه مباحث التموين جت
أجري خبي داري
خبطوا على المخزن افتح بسرعه
فتحنا قام ريس العمال رمالي الخيط وقلي خبيه(هنا عرفت ان في حاجه) أرتبكت من المفاجأه مهو مكنش في بالي اننا بنعمل حاجه غلط
المهم أخدت الخيط وجاي اخرج بيه بره المخزن لقيت واحد من مباحث التموين واقف وبيبصلي عملت نفسي مش واخد بالي وغيرت اتجاهي وخبيت الخيط
كل ده وانا لسه متضحتش الصوره عندي
فتشوا شويه وراحوا على مكان تاني
راحوا على الثلاجه فتحوها اخدوا عينات منتهية الصلاحيه كتبوا محضر محترم في خلال ساعتين من الشد والجذب
ادارة الشركه اتصلت بالحج (اي صاحب مصنع او شركه او مؤسسه يسمى الحج) وكان بيتابع التطورات
لحد ما اضطر ييجي بنفسه خلص الموضوع وخدوا اللي فيه النصيب ( مباحث التموين)ا
طبعا مباحث التموين عملت محضر محترم موثق بالعينات لان كلما كان المحضر ذا خطوره كلما كانت الرشوه اكثر
الطريف في الموضوع بعد ما مباحث التموين مشيوا بعدها بخمس دقائق رجع السواق بتاعهم (كانوا في مصنع بجوار الشركه) لسبب وهو ان القلم اللي كانوا بيكتبوا بيه المحضر كان بتاع محاسب الشركه وهما نسيوه معاهم
ولذلك بعتوا السائق عشان يرجعه
اليوم ده كان طويل والشغل خلص تقريبا الساعه 2 بالليل
فكرت ازاي امنع الاغذيه المنتهية الصلاحيه دي اتصل بمين ولا ابلغ مين (فكروا معايا )ا
المهم واحنا راجعين البيت بنمشي مسافه تقريبا 4 كيلو واحنا بنجر رجلينا قلت لصحبي محمود (طالب بهندسة بترول السويس ) الاسبوع الجاي كله مش عاوز اشوفك خالص (لانه قالي ان الشغلانه سهله)ا
قبل ما انسى من امثلة منتجات الشركه
كل احتياجات رمضان الغذائيه بلا استثناء
...........................................................
